Romamamma的非飛人生活

之前寫過papa 嘅飛人生活
今次講下我自己
話題就當然都係離唔開MPA
即係Matteo, Paolo & Alessio 呢三條king
我咪變咗做阿四囉
暑假話咁快就完咗
毛毛返咗三個星期暑期班
Papa又係不停飛
而且已經去完伊朗
一個佢唔想去嘅國家
（我都估到佢終於都係要去其實我都想去呢個國家）
又係長途trip
伊朗五日+馬來西亞，Kenya, Tanzania &科威特
本來之後仲要去約旦+以色列
但因為以巴局勢緊張
所以唔去住
但九月要去巴基斯坦
真係話唔埋有日要去伊拉克，阿富汗，利比亞都似
而家仲有邊個地方係百份百安全？
突然又話唔洗去巴基斯坦喎
不過幾日前同我講應該十月頭要去以色列仲要去埋伊朗
九月十五號係開學日子
Papa已經去咗中東
得我一個應付所有開學嘅準備

由我哋去杜拜旅行開始
保保毛毛包括我自己都瞓到好遲先起身
仲keep住holiday mood
開學前兩日我好精神緊張呀
怕保保唔肯起身因為第一個禮拜佢要8:30am 開始上堂
不過由於佢讀K1第一次到新學校
所以老師只要求新學生留喺課室個半鐘實習下
第一個星期嘅安排就係咁10am可以放學
不過毛毛係K2放12 點
於是第一日我6點就起身
好似我自己開學咁！都可以話係因為要陪保保一齊上堂
毛毛7am就醒好彩
三條K食完早餐換好校服就先放低力力喺99度
可憐的99要一次過睇住兩個六個月大嘅孫
Papa 嘅妹妹已經放完產假
兩個星期前已經開始返工
我陪保保上堂到10am
然後去超市跟住就返屋企
將保保交比99（咁樣99就唔洗一次過對住兩個BB）
我餵完力力奶換埋片
我就帶力力去學校接毛毛
又係要早D出門先搵到位泊車
第一日開學我一早起身煮定意粉for lunch
第二日冇咁做食隔夜飯算
第三日好辛苦因為毛毛嗰班3pm有家長會唔可以帶小朋友去
99仲辛苦要一對四
好彩papa個妹叫咗佢99過嚟湊佢個BB女
佢個99都好樂意雖然住得遠來回車程至少兩個鐘
聽日輪到保保嗰班有家長會
唉好忙呀
仲等我以為下星期有papa幫下忙唔洗飛
點知突然要提早去以色列
好彩下個禮拜開始四點半放學
我就有時間玩下烘焙