試食

Papa嘅姑姐生日
我哋去咗佢屋企食飯
不過今次係佢嘅細仔煮
從來冇煮過比我哋食
佢一向都好少入㕑
只係攪親bbq都係佢燒因為佢最叻
如果係papà 燒就唔掂
燒到D食物外面燶入面又唔熟

最近阿姑姐細仔時不時做蛋糕同麵包
喺姑姐65歳生日個晚我哋有幸品嚐佢嘅廚藝

平時嘅家庭聚會多數都係姑姐同奶奶煮
今次係佢仔仔同奶奶下廚

有煙肉加zucchini 個碟入面係飯

不過煙肉未夠熟

我對呢個冇乜興趣反而想食包包

波波型麵包𥚃面有ham & cheese

又幾好味

超級好味嘅肉丸意粉

其實肉丸意粉係咪源於意大利?

其他國家嘅意大利餐廳都有meatballs with spaghetti

但唔多覺本地嘅餐廳menu 有呢個dish

平時食開嘅meatballs 都係比較實硬

Papà 堂細佬做嘅就軟同juicy

呢碟唔知叫乜

係鹹味麵包/蛋糕上面有溶緊嘅芝士

切開咗好靚又紅又綠

因為有青豆同火腿

會幾適合聖誕節

佢做嘅pretzel雖然形狀唔係傳統嗰隻

但係味道好好

我都想學下點整

成個蛋糕都係佢一個人做

四層海棉蛋糕之間分別用咗Nutella，cream 及custard 做filling

蛋糕面用切好嘅cupcake 成姑姐嘅歳數

好感動

如果我D仔弟日煮比我哋食我一定會好開心

奶奶仲整咗意式燒肉及其他菜式

多到要我哋打包

So far so good

Alessio 已經一個多星期大
我叫佢做力力
白天成曰瞓
夜晚都瞓不過瞓得麻麻哋
通常要到六七點先至可以瞓得好
咁都好因為呢個時段我開始忙
毛毛保保起身就要凖備早餐同換衫
老爺付責接送到學校
講返力力出世嗰日
我第一眼見到佢個樣
嘩乜塊面咁大嘅
第二三日佢塊面就縮咗水

後來99估會唔會係我生力力之前注射咗類固醇
所以谷脹咗佢
今胎係第一次要打類固醇頭兩胎無需要
原因係喺意大利割腹生產如果開刀日期比預産期提早10日或以上（唔係好記得正確數字）
孕婦就有必要注射cortisone 去提升BB個肺工能嘅發展速度
琴日返去醫生度拆線
好彩個傷口冇事
其實當我知道papà個妹開刀後發燒咗個幾禮拜
少不免我有D擔心因為佢傷口入面發炎
我哋兩個都係跟同一個醫生
我知道任何手術都存在風險
但始終擔心都正常嘅
我唔希望有咩事發生因為一病就好難照顧家人
到我出院papà先同我講究竟佢妹妹開刀嗰日發生咩事
次次我都係後知後覺...
雖然我一直覺得有D奇怪
唔明白點解佢妹妹一出院返到屋企嗰晚就發燒都冇去醫院
家人個個都好似好calm咁
因為佢哋已經知道發燒嘅原因
只係唔想比我知道真相
真相就係手術過程中出錯或發生意外整傷咗一個器官
係出錯定係無法避免嘅意外我諗只有醫生同手術室嘅醫護人員先知道
後來我上網睇查下先知道原來開刀生BB最常見嘅risk 就係bladder injury
平均每一千個手術就有一次
即係話每個婦產科醫生喺佢幾十年行醫生涯𥚃面
無論幾有經驗都好都有失手嘅可能
我同一個香港嘅醫生提起呢個case
佢都承認佢有二十幾年開刀接生經驗
兩年前第一次發生同papà 個妹妹一樣嘅case
因為我哋係跟同一醫生
梗係冇人敢喺我入院前同我提呢件事
Papa阿妹已經好番D
而且99都好幫得手

收山之作 四年抱三

三月四號係martedì grasso / mardi gras 嘉年華

毛毛扮Batman返學

 保保扮米奇

今年係第一次兩個都肯扮鬼扮馬


佢哋嘅細佬今日出世喇

第二日

辛苦曬Alessio 我知道你响肚入面都好辛苦因為你一直陪我照顧兩個哥哥

呢幾個月嚟有時二佬玩嗰陣唔小心踢到你

不過哥哥成曰都有kiss你㗎仲話會比佢哋嘅玩具你玩


你終於唔想再等提早出嚟同我哋見面

Mamma 年紀大了經歷咗三次開刀已經感覺到體力上冇可能再成受第四次懷孕

手術後成十個鐘對腳仲麻痺

又吐咗好多次醫生話係藥物side effect
但上兩次冇事第二胎嗰陣生完第二曰行路都唔會太痛
可能始終年紀大咗

第四日食完呢份早餐我哋就返屋企

入院前最後一撻

入院前最後一撻
一直想食椰撻但遲遲未動手
今日終於整咗
因為話說...
琴晚個肚感覺有D怪小腹有小許唔舒服但又唔係痛
雖然我已經生咗兩個
其實我都唔知道收縮真正係點？何謂contraction?
因為頭兩胎都係開刀大家都知道如果係選擇性開刀
無可能等到due date咁遲先開刀
通常會於一至兩個星期前就做手術
所以選擇性開刀嘅媽媽從來冇體驗過劇烈性嘅宮縮並不出奇
我只係聽過人哋形容同埋靠睇書上網得到一點點知識
星期五先見完醫生一切正常
點知琴晚即星期日開始有D奇怪
每幾分鐘就有小小痛或唔舒服次次都係同一個位
持續咗個幾鐘而每次都係last 幾秒就消失
我諗會唔會係contraction 嘅開始？
乜唔係開始嗰陣只會係irregular咁
而我就咁快就有regular同咁frequent 嘅宮縮？
所以我都唔知到底係乜嘢事
咁啱papà 出完trip 返到嚟
飛完十幾個鐘攰又餓
衫都未換
佢一聽到我話有D唔對路
佢好緊張一來佢已經好攰
二來佢今個星期嘅schedule 已經編好曬
原本今日要去Milano一晚
星期三要去另一城市...
所以突然間佢變得有D緊張
我完全明白
我決定打電話同醫生形容我嘅情況
佢話我最好去佢度比佢check check
嗰陣已經就快9pm Sunday night
我問幾時？聽日呀？
佢話no, 係今晚呀叫我出門口前打電話比佢先
好彩個醫生同我住同一區
佢嘅診所同住所都係同一條街行路返工就得
去到又冇咗嗰D唔舒服嘅感覺
Check 完照完monitor 完心跳加宮縮又冇發現什麼大變化只係同上星期有小小唔同
Anyway 唔想寫得太長
結論係醫生話可以幫我book 早D做手術因為bb有可能早過原本訂咗三月中嘅日子前出世
Papa話OK啦佢唯有cancel今日嘅trip咁聽曰就可以陪我入院見完bb夜晚就搭最尾班機去北意一晚第二曰就返嚟
因為papa咁啱呢個月會轉新工
新公司已經幫佢訂好酒店同機票叫佢過去簽contract
佢己經改過schedule一次因為佢妹妹一個多星期前生BB
Papa又已經同人哋講咗我會15號入院
依家好難同新公司要求改曰期根本都唔好意思啦
我冇所謂橫掂我冇打算要佢留喺醫院過夜陪我
雖然佢有提議過
唔洗喇，第一胎就話姐
依家屋企有兩個細路夜晚要有人講故仔㗎
聽曰入院
所以今日我做咗椰撻其實係第一次做
當為自己打氣