2014 杜拜五人行

兩個大喼三個細喼
帶埋張BB用嘅床單上機因為Emirates 嘅嬰兒籃係冇提供只係比張blanket 你就算

不過始終都係自己帶埋衛生啲
我哋去旅行就係咁次次都要帶勁多手提行李以便不時之需
尿片，三個細路extra 衣服仲要連自己都要帶多仲衫換，因為好可能BB吐奶或者毛毛保保飲嘢唔小心倒瀉攪到我都要換衫
兩個大人兩個小朋友加一個infant去旅行點推喼？諗咗好耐帶一部BB車定係兩部好？已經咁多行李顧得邊樣？帶一部又怕如果有兩個瞓着咗點算？我仲打算帶揹帶，越諗得多就越多嘢想帶。最後。。。

就咁樣啦

特登買個Buggy Board 如果佢哋其中一個唔想行路或行得太慢就叫佢企上去！呢個Buggy Board我大約三年前見到有人用，睇落幾方便但我又唔知實唔實用，而且又唔平雖然有啲牌子仲更加貴，最後我決定咗買希望嚟緊呢10曰用得着

就係咁papa拉三個喼
我推力力

毛毛保保各自拉一個因為佢哋唔肯畀我哋幫手所以行得好慢又阻住其他人

我叫保保企上去Buggy Board我推佢哋兩個仲好
但係保保個喼仔點算佢企咗上去就少咗一個人拉喼
於是我掛咗佢個喼上BB車度（我帶埋兩個扣！我問papa記唔記得香港啲阿婆帶埋幾個扣坐車用嚟勾住一袋袋嘅餸？哈哈）左手垃喼右手推力力＋保保但係一隻手推好吃力根本部車行唔到一條直線！我要部車直行佢就一時轉左一時轉右最煩係喺呢個時候毛毛要我隻手拖住佢隻
手先肯繼續行
我都冇手點拖你呀

今次係保保第一次有自己嘅位有私人電視加兒童餐所以我哋全家可以坐得舒服啲但今次亦都係有個無位坐嘅infant 與我們同行哈哈哈

真係好熱但估唔到會咁熱所以八月係淡季

又係住返同一間酒店但唔畀我哋兩個大人加三個細路book 一間房所以今次揀咗酒店嘅
residence 仲方便自由度大啲

原來好大最正係下面有超市又可以自己煮飯仲有洗衣機連洗衣粉
我哋自己間屋冇咁大所以毛毛保保特別開心
傻豬毛毛有時見唔到我佢就大叫mamma你喺邊呀我搵唔到你

洗碗機都有但我唔識用因為冇用過亦從來冇諗過要裝番一部喺屋企，我總係覺得要將碗碟沖沖水先放入機儲埋一次過先開機，都已經麻煩

對面海係The Palm

酒店後面

嚟過幾次杜拜不過未去過The Palm，其實papa book 過幾個地方包括apartment 同埋一間位於The Palm 嘅酒店因為淡季價錢ok, 但最後都取消booking訂返我哋以前去開嗰區，因為嗰度方便，小朋友又可以去酒店嘅kids club見番同一個菲律賓老師。毛毛稱呼佢做老師因為佢當咗呢個kids club 係學校。坦白講我哋揀嚟揀去都係住返呢度唔多唔少都係因為呢位親切嘅姐姐，
佢實在好有愛心同耐性，可能呢間酒店對啲員工好當然我相信公司對員工嘅要求亦好高，基本上好難喺杜拜遇到太差嘅服務。連酒店嘅賓藉女保安都認得我哋，証明我對呢間酒店幾loyal哈哈！

今次保保同毛毛唔想似舊年一樣去沙灘拾貝殼玩水，日日都話要去泳池同埋kids club, 唔肯去
海灘話驚

今日開始鍾意玩腳仔不過淨係右腳

兩隻駱駝

咁又差唔多一年！上年九月我仲陀住力力一齊嚟旅行，今年我哋八月舊地重遊力力已經五個月大！

酒店對面開咗一個新outdoor mall有戲院同好多餐廳，尤其係美式連鎖餐廳特別係以漢堡為主打嘅，什麼Shake Shack, The Counter, Eggspectation 等等


對我嚟講好新奇因為住喺意大利冇呢D嘢嘛
有時力力瞓咗我就喺酒店陪佢papa就帶毛毛保保落街買外賣
佢哋去咗Shake Shack 保保見到有雪糕就係都喊住要佢老豆買連毛毛都加入喊埋一份！
都知道佢哋唔會食但死要買blueberry 同cherry口味
Papa一返到嚟叫我食晒兩杯溶緊嘅雪糕因為嗰兩隻嘢買完食咗一啖就唔食，激氣！
我試試啦食落又唔似雪糕嘅口感仲有大餅塊喺𥚃面，於是我上網check 下個menu
原來叫dense frozen custard ice cream


講開外賣，杜拜嘅take away包裝都幾講究（比起意大利）

有晚喺呢間世界各地都有分店嘅意丈利餐廳買咗個Caesar salad （因為papa減緊肥個汁唔落）
佢話只係買個沙律但點解會有幾個盒？因為papa出差時幫襯過呢間餐廳而我哋都喺呢度食過兩次，佢哋嘅員工大部份都係從意大利過去杜拜做嘢嘅那不勒斯人，同聲同氣所以就買一個沙律送一杯可樂，薯條同埋一個兒童餐size嘅pizza!

第一次叫兒童餐唔知道佢個pizza係兔仔造型因為menu冇show相出嚟，所以D食物一上枱兩兄弟極之興奮

                                           好耐冇見過細玻璃樽可樂意大利只有大樽


毛毛保保食過兩次兔仔pizza後已經對呢塊外賣版一模一樣嘅pizza失去興趣唔會爭
但係羅馬分店個menu都冇呢個咁可愛嘅pizza
而且杜拜分店嘅menu有多D選擇
不過有一樣嘢冇變嘅係佢哋啲pizza 餅皮非常有彈性

有一晚papa落去酒店附近買雪糕我以為佢去買兩杯比毛毛保保食就算
點知。。。

我呢啲師奶一見到就話吓你買一tub咁多仲連埋個冰袋？
原來個冰袋係包埋唔需要還番畀雪糕店
好貼心連埋紙杯濕紙巾，個冰袋我當然帶返意大利

意大利唔係咁㗎嘛所以我哋點知呢做咗大鄉里
諗諗下中東咁熱如果冇冰袋都唔會有人走去買一大盒雪糕

仲有一次叫兩個沙律外賣，一份calamari rings，一份grill魚
竟然喺個袋入面揾到六盒唔同味嘅醬汁

帶住小朋友去旅行出街食嚟食去都係離唔開意粉，pizza及飯
其實每日午餐都係自己煮，晚餐出去食多不過出門前我一定餵咗兩隻小魔怪先得
毛毛係一個一出世就唔多鍾意食嘢嘅人
要佢食一餐用上最少一粒鐘，所以為咗唔想喺公眾場所失儀態鬧仔
亦冇氣力去氹佢最好方法就係迫佢食完先凖出街！
我想轉口味食印度嘢但我哋知道毛毛入去聞到啲味又話臭
中東嘢更加唔得
同細路仔去旅行係自己辛苦我哋知道㗎
不過我哋唔會因為呢個原因而唔帶佢哋出去走走

我哋雖然有三個仔但係喺杜拜見到好多外國家庭都一樣帶住三，四個小朋友嚟旅行
日日都喺泳池見到佢哋
Papa係最辛苦嗰個日日抱住兩個一齊玩水
佢朝早帶力力去散步買早餐然後一個人去跑步
毛毛保保瞓到好晏早餐過後送兩兄弟去kids club
呢個時候papa自己一個去海灘游水

我就帶力力去超市買餸準備午餐等待papa接毛毛保保上嚟
食完lunch呢一段時間係最難攪，就係幫小朋友換衫搽防矖準備個大袋裝晒一大埋嘢去泳池
幫佢哋換衫好似玩捉迷藏咁周圍走、又唔肯搽防曬
自己又要準備又要餵埋力力人奶先落去
去到佢哋又周圍跑兩兄弟打交爭玩具亦要睇實附近嘅小朋友，因為就算係小童池有D大個小小嘅細路都會做埋啲危險行為影響到其他小泳客

最愛face painting 

兩兄弟日日都要姐姐畫面佢又超有心機日日幫佢哋畫 Batman Spider-Man
有時見到姐姐忙我為咗減輕佢嘅workload 我提議毛毛不如畫隻手表啦型D呀

                                                             日日玩到唔想瞓覺



一落街行幾分鐘就到海灘
舊年海邊仲起緊個outdoor mall而家大部份嘅商店及餐廳已經開張

仲有室外健身儀器

我見有人用㗎包括中東女人
玩下就得咁熱點可能真係做gym?

十日嘅旅程過得好快
返到屋企毛毛同保保依然精力充沛
晚晚都夜瞓
尤其係保保
有時講講下故仔畀佢哋聽竟然係我先瞓着！
佢哋就拍醒我問我點解瞓着咗

假期後遺症發作


仲有兩個星期先開學。。。
Papa又飛咗
突然間得番自己一對三照顧三條king
返回現實

Miami 2013 (下）

呢位伯伯勁呀佢係真真正正嘅one man band！一次過用口，手同腳玩三種樂器。
自由活動時間，lunch 喺Bubba Gum攪掂，好似比香港嘅好食D。

附近不停有好多尖叫聲同埋見到好多幾歳至十幾歲嘅妙齡少女，原來係Justin Beiber 喺對面開concert。車！

Coral Gables 呢區嘅樹好大棵，我覺得有D恐怖，夜晚一定唔敢經過。

我哋去咗Little Havana 古巴區。之前睇過一個電視節目叫Dynamo, 即係嗰個可以喺Thames河水上行路，又將可樂變芬達嗰位英國魔術師，有一集講佢喺呢區表演。當然呢D係tricks, 話晒佢都係一個illusionist , 有時睇下魔術，令我哋嘅童真可以出返嚟。相係有影但我哋都仲未upload 上電腦，都過咗一年喇...


導遊介紹我哋一定要試下古巴咖啡，我唔好咖啡嘅，雖然papà 話好香叫我都試下，我都係冇試囉。

跟住導遊帶我哋去South Beach經過位於Washington Avenue 嘅Miami Ink 紋身店但
冇得落車，只係去到海邊個 導遊先 比我哋落車影下相。佢就沿途指一D明星嘅物業比我哋睇又或者同我哋講呢間吧係拍過邊套戲等等。突然間聽到Gloria Estefan 呢個名，嘩已經N年無聽過呢個名，我已經3X歲所以無需扮唔識呢位歌星係乜水，不過我只係記得兩首歌：cut both ways 同埋一隻唔知叫咩名嘅電影主題曲，好似係史泰龍做主角，歌詞係turn me upside down....MTV 裡面嘅直升機不停咁飛。

講真我對Miami全無認識只係靠睇電視知道嗰度有唔少沙灘，蒲點同名星 。例如CSI Miami, Miami Ink, Kardashian 姊妹嘅Khloe Kourtney Take Miami 仲有Robin Williams嗰套Birdcage笑到我肚痛！Miami Vice我冇睇過。
去到先發覺原來Miami 好多外地人 ，到處都聽到非英語嘅語言。洒店嘅員工佢哋自己都唔係用英文溝通。出去行街食嘢見到嘅人大部份都係拉丁裔，雖然明明身處美國，但總有D唔知自己去咗邊度嘅感覺。就算去其他省份都會見到亞洲面孔，黑人呀等等，但Miami 就另一天地。

臨走前我哋去咗超市一轉買咗好多BBQ sauce 同零食做手信，美國佬最叻製造junk food ，响意大利口痕想食salt & vinegar 味嘅薯片都揾唔到。

離開Miami前我喺機場嘅免稅店幫同事買煙，比咗錢不過個cashier無將貨物交比我只係比張收據我，叫我入咗閘口先可以提取。後來問一個經常去美國嘅朋友先知道原來呢個措施已經實施咗兩年。

我已經開始諗帶住三個細路去遠行會係點樣...

Miami 2013 （上）

2014仲係寫緊2013 二月嘅遊記

Miami 係我哋去Dominican Republic 轉機嘅地方。唔知係咪時間唔夠，好似去完Miami 都唔覺睇咗D乜嘢，呢個trip真係走馬看花，臨走前我仲病埋, 返羅馬程機辛苦到庳,因為感冒同氣壓關係，耳仔痛，成10個鐘抱住保保手都麻庳，一返到屋企立即瞓上牀，叫奶奶睇住兩個小朋友，辛苦程度無法形容，我不停咳，唔想食任何嘢，想嘔又嘔唔出，papà 仲勁佢返到屋企一陣後就即刻返工。醫生話係氣管炎不過好似個肺有D嘢去照下穩陣D，點知照完x ray 又話我唔洗擔心因為報告ok, 但食完藥都係咳，之後仲咳到連D骨同肌肉都痛埋，唯有請幾日病假。

喺Miami 嘅時間唔多，第一日到已經係夜晚。我問papa喺張custom form到有冇填我哋有baby food? 佢話唔洗申報啦係人見到baby food 都會比我哋過。依家冇話唔帶得baby food，但係如果我地有帶而冇申報比海關查到就大鍋！好多年前我喺L.A嘅海關比個officer捉到，其實係我自己大意，因為肉類不可入境，咁我就帶個vegetarian口味 嘅杯麵，點知唔記得入面有雞蛋，個officer睇咗包裝上嘅ingredients 話我知有蛋喎，佢打開個杯麵，掉咗包調味料，比返個麵我，又同我講會將我嘅資料輸入電腦，跟住仲問我喼入面仲有冇其他forbidden 嘢...嘩攪到我流汗！所以一定要諗清楚帶咗D乜嘢入境。英美加澳紐出名嚴，有次有個同事入境Sydney比人捉到帶咗條蕉，唔知道係佢忘記入境前要食咗條蕉，定係特登唔申報，最後罰咗AUD120！

美國機場嘅immigration成日都係排長龍，Miami 呢個咁busy 嘅機場就當然唔會例外。嗰度寫明唔可以用電話電子用品，佢唔理，同其他意國人一様！佢話佢又唔係打電話，只係check email , 比佢激死。  Papà 呢種性格去到外地好容易犯法。排隊嗰陣我見人群中大部份人都著住美國牌子嘅T-Shirt ,唔係A&F, Holister，就係Aeropostale，包括我老公在內，好似賣廣告咁。哈哈佢哋梗係覺得去美國一定要著到咁。

第二日我哋join咗個day tour.。原本我哋叫咗部的士，但司機見我哋有兩個細路就問我哋有冇carseat,梗係無啦，無carseat就拒載。我提議不如join tour 算吧！橫掂美國啲接駁酒店同商場嘅shuttle bus 大部份都要比錢。真係好！join tour 細路仔係免費，佢哋眼瞓嘅話都可以比佢哋喺車度瞓，如果我哋自己搭車轉嚟轉去，上上落落都好麻煩，都係join tour方便。

Dubai 2013

八曰七夜嘅杜拜之旅話咁快就完結。今次最開心嘅更係毛毛同保保啦！日日淨係玩。毛毛話唔想返意大利喎，梗係啦唔洗返學，日日瞓到九點幾，食完早餐，玩水玩沙，lunch 過後就去酒店嘅kids' club 玩，papa 就會喺呢段時間返回海灘自己一個人游番夠本，或者去gym。日日喺海灘睇住兩隻monsters幾個鐘 簡直攰爆！佢吔唔怕水所以我仲驚過佢哋。沙灘上有個area 係比小朋友玩，等如一個小型遊樂場，因為有其他不同國籍小朋友在場，所以少不免佢哋會互搶玩具，雞同鴨講，而且嗰度大部份小朋友都係俄羅斯人，佢哋唔同毛毛玩，只同自己友玩。

未出發前我已經知道去杜拜要食乜
就係去Cinnabon ！喺意大利食唔到自己又唔識整。保保個傻豬攞咗papà 杯凍咖啡嚟飲，第二次去嗰陣佢一手搶咗杯凍飲，搞到成杯跌落地。早餐佢見我飲cappuccino, 佢又要學人飲，好彩係decaf。

Dubai 周圍都係靚車，應該話靚唔靚係見人見智。今次見到有一部車個様成部坦克改裝嘅款，仲有部shocking pink 嘅四驅車，仲有部警車竟然係白色林寶堅尼！聽講杜拜買咗200部名車做警車，洗唔洗呀？

咁大部Hummer顯得兩個細細粒更加細粒

要毛毛影相好睇心情  保保合作D

個喼係毛毛嘅但佢唔肯拉，反而保保爭住要拉，唔肯放手，其他乘客見到佢拉喼個樣都覺得好笑。個喼好重㗎但佢又垃得到，不過行得慢D，我哋想幫佢，但佢嘅性格唔肯比人幫，我哋攞走個喼佢就喊，死都唔肯跟我哋走。佔有慾好強呀！

每次嚟杜拜都係住返同一間酒店，因為一出門口就係沙灘，最主要係呢間酒店有kids' club, 免費有個好nice 嘅菲 姐姐同小朋友玩。佢叫Iresh非常友善，仲認得我哋。希望下次返去再見到佢啦！佢話呢份係筍工喎唔想轉工。

毛毛唔想離開Dubai 佢話要同保保留低，我問佢咁你哋瞓邊呀？瞓車𥚃面喎。