黑芝麻餅

有日見到個黑芝麻餅recipe
咁啱有一包冇開過嘅黑芝麻
見個做法唔難
立刻動手
甜中帶咸
下次可以用白芝麻或黑白mix
我整出嚟D餅有龜紋又冇人哋切得咁靚
唔緊要啦連小毛毛都肯食

墨魚餅

第一次整

無馬蹄加咗D肥豬肉

€7嘅墨魚就做到13塊

凍咗之後仲縮咗水似肉丸多D

毛毛第一次入戲院

講咗話帶毛毛去睇戲已經兩個月
星期六papa終於同毛毛兩父子去咗睇"Planes"

有考慮過帶埋保保去但係怕佢入到去會怕黑，怕嘈，喊，瞓着又或者中途想走，所以決定唔帶保保去睇戲。保保食完lunch 後就瞓着咗，papa同毛毛就趁機薯咗出去。

我問papa毛毛喺戲院入面情況點，因為我好想知道毛毛會唔會出現以上我擔心會發生嘅反應。papa就send咗幅相比我睇,原來佢不知幾開心。

係我就唔會買咁大杯可樂同chips比毛毛！加埋一枝水咁就€8

星期六大人票價€8, 小朋友都係呀

我問papa毛毛係咪瞓着咗，唔係喎，返而papa就嚟瞓着，套戲好長成間戲院得10幾個人

神奇的牛油

原來牛油可以咁樣用嘅

有一晚保保個頭撞到枱腳

即刻腫咗，係超級腫嗰隻

平時如果係小小事就會喺freezer攞包雜菜"夫一夫"

但係今次成隻雞蛋咁唔work 喎

我哋問住喺後面既auntie 有冇cream 可以借

佢話我哋可以用牛油

吓？我哋幾個人都無聽過用牛油消腫

不過試下啦99即時切咗兩塊牛油

等咗幾分鐘D牛油開始溶，保保又不停喊，好懷疑work 唔work....

身邊嘅人話唔洗帶保保入醫院

但係我同papà 比較緊張因為第二曰papà 出trip 6299 後日去旅行，如果有乜事咪得返我一個人handle

我同papa 換完衫之後見保保已經無咁腫，所以無去睇急症

第二日帶保保返學我就請教老師，原來佢吔都係用牛油㗎，因為一般嘅cream 只係比大人用，14歳以下唔用得，不過都有一D all natural ingredients嘅cream 賣，我都係依家先知。

今朝見到auntie 我好奇地問佢點解佢會知道用牛油都得？原來佢個仔細個嗰陣從bb車跌落地，咁啱佢哋行緊market 有個檔主見到就即時攞咗D牛油出嚟。

原來用牛油消腫係一個快速又有效嘅方法，唔洗花時間烚雞蛋。

Dubai 2013

八曰七夜嘅杜拜之旅話咁快就完結。今次最開心嘅更係毛毛同保保啦！日日淨係玩。毛毛話唔想返意大利喎，梗係啦唔洗返學，日日瞓到九點幾，食完早餐，玩水玩沙，lunch 過後就去酒店嘅kids' club 玩，papa 就會喺呢段時間返回海灘自己一個人游番夠本，或者去gym。日日喺海灘睇住兩隻monsters幾個鐘 簡直攰爆！佢吔唔怕水所以我仲驚過佢哋。沙灘上有個area 係比小朋友玩，等如一個小型遊樂場，因為有其他不同國籍小朋友在場，所以少不免佢哋會互搶玩具，雞同鴨講，而且嗰度大部份小朋友都係俄羅斯人，佢哋唔同毛毛玩，只同自己友玩。

未出發前我已經知道去杜拜要食乜
就係去Cinnabon ！喺意大利食唔到自己又唔識整。保保個傻豬攞咗papà 杯凍咖啡嚟飲，第二次去嗰陣佢一手搶咗杯凍飲，搞到成杯跌落地。早餐佢見我飲cappuccino, 佢又要學人飲，好彩係decaf。

Dubai 周圍都係靚車，應該話靚唔靚係見人見智。今次見到有一部車個様成部坦克改裝嘅款，仲有部shocking pink 嘅四驅車，仲有部警車竟然係白色林寶堅尼！聽講杜拜買咗200部名車做警車，洗唔洗呀？

咁大部Hummer顯得兩個細細粒更加細粒

要毛毛影相好睇心情  保保合作D

個喼係毛毛嘅但佢唔肯拉，反而保保爭住要拉，唔肯放手，其他乘客見到佢拉喼個樣都覺得好笑。個喼好重㗎但佢又垃得到，不過行得慢D，我哋想幫佢，但佢嘅性格唔肯比人幫，我哋攞走個喼佢就喊，死都唔肯跟我哋走。佔有慾好強呀！

每次嚟杜拜都係住返同一間酒店，因為一出門口就係沙灘，最主要係呢間酒店有kids' club, 免費有個好nice 嘅菲 姐姐同小朋友玩。佢叫Iresh非常友善，仲認得我哋。希望下次返去再見到佢啦！佢話呢份係筍工喎唔想轉工。

毛毛唔想離開Dubai 佢話要同保保留低，我問佢咁你哋瞓邊呀？瞓車𥚃面喎。

快樂

快樂係...

可以咁簡單

一直想買一個連蓋嘅plastic cake holder, 但見過嘅都要十幾€一個。屋企附近最近開咗一間大型家居用品店，琴日入咗去本來只係需要買一份禮物（玩具）比毛毛嘅同學，因為佢同學明日生日開p請晒全班同學仔。行行下比我見到呢個cake holder，唔洗€5，大大個有4個扣方便攜帶仲有顏色揀，Made in Italy 添，唔洗考慮一手攞起紫色嗰個，呢份就係我送比自己嘅生日禮物！雖然唔係乜嘢特別或名貴嘢，但係我已經好開心比我發現到呢個cake holder。可能我個人比較怪，對名牌無乜感覺，自從做咗mamma後都好少用真皮手袋，高踭鞋簡直無乜著過，除非去飲啦。基本上帶住兩隻小怪獸出街連同一個奶粉袋，已經唔想再 "meh" 多個手袋，鞋就當然要舒服必要時可以跑嘛，都話要睇住兩隻monsters 囉。所以D手袋買咗都無乜機會用，其中一個名牌羊仔皮袋更加一次都未用過,所以而家買嘢都會揀D實用嘅。

我一向喜歡低調地渡過生日，除咗廿一歲嗰年同埋第一年嫁過嚟家人幫我攪咗個surprise 後，之後都無乜特別攪作。

因為papa 有一個大家庭，而今年佢嘅cousin 榮升做爸爸，咁啱cousin同佢 嘅partner/girl-friend (未結婚）又係十月生日，所以佢哋一次過喺屋企慶祝生日。一個星期後，到99生日，今年無出街食喺99屋企食晚飯。跟住到保保啦，隔幾日又倫到我。我同papa講嘩今年咁樣食法，連續一個月個個禮拜都開party ，次次都煮超多食物，大家都食到"濟",不如到我嗰日唔好慶祝住，遲D先啦叫99千其唔好又煮一餐佢已經好辛苦，papà 話ok無問題點知生日之前嗰日papa通知我話去99到食不過唔洗煮叫pizza大家食。梗係99話去佢度食，佢又一定係煮好多好多嘢多到要每人打包走！佢咁有心咁我都要contribute下話晒係我生日佢幫我攪咁多嘢，又要洗碗，所以我盡量將我準備D食物用錫紙tray裝，等佢唔洗洗咁多嘢。

可能因為保保生日我整咗太多finger food 加上家人知我鐘意做甜品，佢哋不約而同送咗全部同整甜品/食物有關嘅禮物比我。

上兩個禮拜有一日我去探一個同事，原來佢住嗰邊有間叫Tiger嘅北歐雜貨店（似IKEA 貨色但D嘢靚D），我唔知道原來Tiger喺其他歐洲國家已經有好多分店，只係Rome 得三間。我一入到去就被呢間店嘅貨品吸引。我好鍾意佢吔七彩心型measuring spoons, 想買但冇買因為係靚但屋企已經有用咗幾年都未爛。我同99提起呢間Tiger店，我知道99一定對呢D嘢有興趣，佢話都想去睇睇。點知佢喺我生日嗰日特登去Tiger買咗D我本來想買最後無買嘅嘢比我，太好了非常感動。相裡面嘅cake stand 我覺得顏色好靚，綠得嚟有D似Tiffany blue。我去嗰日唔覺有，只係得紙造嗰種cake stand, 哈哈好彩我無買到。原來幾€嘅生日禮物都可以令一個中女開心成日。反而有時收到名貴嘢又未必合自己心水，尤其係香水，accessories， 衣服等等。

Sister-in-law 送咗一set 靚靚圓碟加一隻長碟比我，啱哂我因為我無乜呢類型嘅碟。佢哋個個都話送呢D嘢比我我只會忙上加忙，我唔mind喎。

當晚嘅餸又係多到食唔完，papa買咗一個蛋糕，99整咗一個啦，我又整咗一個日式芝士蛋糕。

喺呢度多謝F小姐帶比我嘅臘腸，我用嚟代替叉燒整星洲炒米。我諗出年最好都係攪個10+11月之星生日會會好D。

童言無忌

八月初我哋去咗法國南部渡假，我哋每日晚飯後都會帶兩個小朋友去公園玩。有一次有一個法國黑人小朋友走向毛毛附近，毛毛就用意文問呢位小朋友"你點解會燒燶咗㗎？"好彩個小朋友唔識聽啫，我同papa都忍唔住笑咗出嚟。我同毛毛講個小朋友唔係燒燶而係佢嘅皮膚比較深色。

毛毛開咗學兩個幾禮拜已經學識咗幾個粗口字。佢當然唔係第一次聽到呢D字啦，好多意大利人都講粗口，不論男女三到八十歲。毛毛學校個俢女話佢嗰班有個男仔成日不停講粗口，唔怪得毛毛學得咁快。

回憶 天空之城

呢一篇係喺yahoo blog 個draft 度拎这出來，原來好耐之前開始寫但係一直放埋一邊。揾咗好耐不過搵唔到D相，我而家已經少開電腦又好懶特登揾D舊相出嚟又要upload 好麻煩。
呢個地方好似冇乜人識就算係本地人都唔係人人都知道喺邊知道嘅又未必去過。可能意大利有太多靚嘅地方對於意大利人嚟講咪又係小鎮一個。我係睇完張國立本意大利旅遊書而認識呢個地方，之後開始對呢個天空之城好有興趣。書裏面只係得一幅黑白相，見到有一條行人天橋連接呢個"島", 當時我唔知道呢個地方意文叫乜嘢所以唔清楚位置喺邊同埋點樣去，後來喺意外地喺Let's go Italy發現有提及到一個地方叫Civita di Bagnoregio ，同張國立形容嗰個應該係同一個地方。Bagnoregio嘅地型就好似一个凸咗出嚟嘅"島"。所以我決定有機會一定要去睇下天空之城。
七年前呢個願望終於實現。有一次嚟意大利工幹嗰陣一落機返酒店沖完涼就去尋找天空之城。我記得嗰日係星期六如果嗰日唔去星期日喺好難去到因為去城要搭巴士而星期日係無巴士去嗰度。書教從羅馬坐火車到Orvieto 再坐兩次巴士到Civita di Bagnoregio。我到達Orvieto 等巴士見到有兩個韓國人於是問佢地去邊，原來我哋三個不約而同去同一個目的地，實在太好！我哋等咗成個鐘巴士先到又坐咗成個鐘先到Bagnoregio,跟住我哋去咗揾超市因為個韓國女士突然M到，點知買唔到佢需要嘅嘢因為已經關門，我唯有比咗我包紙巾佢頂住先。等第二架巴士等極都未到，我哋就決定行路但係又唔識路雖然知道Civita di Bagnoregio 唔會離我哋好遠。行咗一陣佢哋兩個突然向馬路嘅車做咗個搭順風車嘅手勢，佢哋都無問過我先。好快就有車肯載我哋，我當時有D驚從來冇唸過會hitch-hike,好彩過咗兩三分鐘就到逹連接Civita 同Bagnoregio 嘅穚。原來韓國女孩嚟意大利之前自已一個喺士耳其旅行已經hitch-hike 過！而另外嗰個韓國女士以前就帶過佢自己媽咪去巴基斯坦玩，佢話因為嗰到風景靚喎。我佩服佢哋！佢哋只係識簡單英文但係就好勇囉！而且佢到根本冇唸過要去天空之城，佢哋兩個本身唔係朋友只係咁啱喺羅馬住埋同一旅館，有個韓國導遊介紹佢哋去Civita di Bagnoregio 仲話一定要去喎。
就係咁我哋三個就結伴同游咗大半曰。呢個城好細一陣就行完但係我覺得咁辛苦坐咁耐車都係值得嘅，因為一望上條橋就比我有wow嘅感覺。我哋搭車返到羅馬已經係夜晩，我哋有交換e-mail不過再無聯絡。韓國女孩完成佢嘅意大利之旅會去德國讀德文，韓國女士係教師。唔知佢哋有冇再返去Civita di Bagnoregio 呢？我就有喇唔洗自己坐火車去而係坐我老公嘅電單車去，第二次去嗰陣橋頭旁邊起咗個細細嘅停車埸。papà 係第一次去嘅如果唔係我佢根本無諗過會去。Bagnoregio 係細但係好值得去一次。有時間可以順便去埋Orvieto，如果無食過公豬（cinghiale, 英文boar)又有興趣試試嘅朋友可以喺呢一帶嘅餐廳試下。
你哋google下Civita di Bagnoregio 就知道點解我會被呢個地方迷倒，尤其係嗰幅被霧籠罩住嘅Bagnoregio 嘅官方網頁相。

不吐不快

如果你係我你會點呢？

有一曰因為我拍醒咗毛毛，所以佢就發脾氣，我做過嘅嘢就係咁多咁簡單，點知之後件事演變成一個誤會，竟然比99大聲問我點解我要搣"mit"（唔記得中文點寫）毛毛條頸？
係咁嘅原本佢喺99 屋企玩緊，當我去接完保保放學返到99 度諗住再接埋毛毛返上自己屋企，毛毛瞓着咗，但係因為我個朋友會帶佢仔仔嚟我哋屋企玩，而且佢哋就快到所以我同毛毛講佢個朋友仔嚟緊我哋屋企呀，但係佢醒後就發脾氣因為每次我叫醒佢，佢就會咁樣，有時自己醒咗都係咁啦。99見到就話做乜我要攪醒人地。我哋個個抱佢都無用 ，99 抱走佢又問佢邊度唔舒服（毛毛成日都話呢度唔舒服果度唔舒服，因為件衫，條褲又呢樣嗰樣唔鐘意所以唔舒服喎！）喺呢個時候99突然彈咗呢句說話出嚟：點解你"mit"毛毛條頸？？？

吓？？？
你幾時見到我有咁做？

好彩我嘅性格唔係好似99同佢個仔咁,佢哋大家都係容易火山爆發，我外表比較冷靜，我反問返99

"點解你咁講呀？"

我知道一定係有D誤會，而且我剛剛抱起毛毛嗰陣已經見到佢條頸有D污漬，睇落似係黑色顏色筆。

佢就指住毛毛條頸，咁我咪同佢講頭先毛毛起身嗰陣我已經見到，係顏色筆啫！

喺呢種situation 冇必要同99大聲 爭吵，因為佢有時會唔係咁理智，佢都係愛孫心切啫。我當時的確係條氣唔順，無端端此佢咁樣話我，仲要係佢問我點解我mit個仔並唔係問我有冇mit過個仔！
其他朋友話我做得啱，不過如果係意大利新抱就同佢黑面啦！都會㗎如果係我老公比佢咁屈法，一定炒大獲。好耐以前毛毛仲係好細個嗰陣，佢扭計又喊我哋特登唔埋佢由得佢喊，99 住隔籬佢聽到後就從佢屋企窗口問papa發生咩事？點解小毛毛不停喊？你哋對佢做過乜嘢？papà 答"我哋無做過什麼你覺得我哋會abuse個仔？ ....當時毛毛係第一個孫99特別緊張，佢仲試過聽到毛毛大喊就上埋嚟拍門。
對於99嘅行為我有時都隻眼開隻眼閉，自問唔係一個好新抱，好老婆，好媽媽...佢其實係心地好好的，對我哋各人都好關心。前一排，我見佢買咗好多葱，多口問佢D葱點用呀因為意國人唔多用葱，佢就話你想要就攞D去用啦，我話唔洗喇只係好奇問下啫，點知佢聽曰去買咗一扎比我。

香橙蛋糕

已經跟beyondkimchee呢個recipe做過幾次 。試咗一次後第二曰又再整多個，因為分咗D比99同埋其他親戚（我哋一齊住），我哋個個都覺得非常好味，每人只係分得一小塊，所以食完返尋味。
唔知係咪因為加咗sour cream所以味道特別香濃D？
蛋糕焗好後要淋上用橙汁加糖粉煮成嘅汁，不過有一次我同小毛毛等唔切，就咁食唔加汁原來一樣咁美味。
可能我哋住意大利（如果北部又唔同喎因為接近法國奧地利，佢哋嘅飲食唔多唔少會受到鄰近國家影響），除左sponge cake 外，大部份嘅蛋糕都會係比較實同乾，呢個recipe 做出來嘅蛋糕都幾鬆軟，用咗牛油嘛！99 問我點整我話有牛油㗎佢問我用幾多先？佢聽完我嘅答案好擔心咁。我99好多時都會modify D甜品recipe 例如將糖份減到好低好低，有一次papà 個妹問佢落咗幾多糖，99話佢個蛋糕用咗4茶匙糖咋。佢個女串佢話阿媽如果你要做唔甜嘅甜品不如唔好做 ，因為佢成曰將D recipe 改到亂匕八jo。
你哋都試下呢個香橙蛋糕啦！

終於開學喇！12.09.13

真好！呢一日我期待咗個半月。從八月開始24小時對住兩隻反斗星，我成個人散晒。

今日只係需要留晌學校個半小時，好彩毛毛無扭計。末開學前我哋已經帶毛毛嚟考察過幾次，亦都見過佢嘅老師，而且毛毛之前都有返開托皃所以今次升幼稚園，並冇喊 ，反而幾開心下。

爸爸出咗差所以呢幾日都係我送毛毛返學。好好彩冇落雨，因為我部車唔係泊喺附近。毛毛嘅學校係要著校服，唉！講起校服都煩！嗰間付責造校服嘅公司好唔掂。打電話去，永遠唔聽電話。我老公八月打去訂校服，打咗好幾次個女人先接電話。個惡女人話你咁遲先嚟訂，要早D訂㗎！咁papà 就問佢咁你有定冇貨鴉？你哋公司係咪獨家幫呢間學校造校服？如果唔係我咪揾第二間囉！佢話有，下個禮拜上嚟攞。攞完返嚟我見D size 好大件就問papa 點解，個女人解釋依家D細路好大隻，所以佢哋無再造細碼最細咪係中碼喎。但係真係超大件囉！條短褲長到差唔多到ankle。最奇怪係件polo 係xs但係嗰件jumper寫住係m,但係就細件過polo 好多，好令人費解。99 見到D校服話一定要攞返去換，佢打電話去嗰間公司，個女人當然又唔接電話，所以99直接去學校反映。校長話其實有其他家長都覺得D校服有D問題，所以如果開學前仲末換得到校服，毛毛可以唔著校服住。

99係一個對衣著有要求嘅人，有時佢見到如果我要帶毛毛出街而毛毛件衫唔襯條褲，99 就會問我有冇第二件換因為上面唔match 下面喎。所以99更係話要攞D校服返去換，我帶埋毛毛跟99去。99最口力同人鬧交，我唔想佢去到同人嘈，但佢嘅性格比較火爆， 同過唔少人鬧交兼反面（老公話比我知！）最後99咪同個女人嘈囉！好彩個女人唔係好似我99咁，我估佢根本唔想做生意又唔醒目，我哋入到去有兩個客人排緊隊，佢同第一個客話佢剛剛同D mamme 鬧交喎。有乜理由佢同D客咁樣講說話㗎？請注意mamme 意文解複數即是之前唔知有幾多個媽咪同佢嘈過啦！佢梗係覺得D客個個都錯。99 同呢個女人嘅談話內容就唔講喇，我希望出年唔好再用呢間公司 ，但如果學校唔轉公司，咁以後就有排受氣，因為每年級嘅校服顏色唔一樣！三歲班著藍色，四歲班黄，五歲紅之後綠，跟住又變返藍。淨係買夏天嘅校服已經唔見咗€200，仲要係無一件係啱毛毛著。

我毛毛係細粒所以D校服要改。佢嗰班有23個同學而大部份都係女仔，我見有D同學嘅校服都係好大件尤其係短褲變長褲因為個褲浪跌到落膝頭。正明唔係得毛毛一個唔著得佢哋嘅中碼。我同一個媽咪傾開校服問題，佢又係同嗰個女人嘈。我哋八月訂話我哋太遲，呢位太太六月訂夏季校服就話未有貨，又係唔接聼客人嘅電話。

我到而家先知道原來意大利D學校連幼稚園都要家長準備一大堆立雜嘢開學。清單上列明紙巾，濕紙巾，24 枝裝crayon, 12 支裝顏色筆，杯一隻，學校指定用某間文具店嘅格仔簿等等（我一直唔明點解歐洲國家要用呢種有細小格仔嘅紙張寫字？）。所有嘢要寫名。我以為托兒所就話要帶好多嘢返去，例如牀單尿片之類呢D都好正常。不過連tissue 都要自己帶就冇聽過。咁一有學生流鼻涕個老師咪要去揾返屬於𠴱位同學嘅紙巾。

學校有飯堂所以要幫毛毛買飯票。有兩種選擇，一係揀partial lunch 即係比較簡單食pasta 或飯，一係就比多D可以食full lunch ,包括麵包，first course, second course, side dish, dessert or fruit。我揀貴嗰種因為毛毛係一個由出世就掛住玩唔食嘢嘅細路，因為咁佢成日令我好炆，好多時食成個鐘都食唔完 ，又唔鐘意食肉，火腿就超愛但可以成日食。一本飯票有十張共€47，暫時比毛毛試下10 次，通常D小朋友返學就食得多同快，我希望佢喺學校會學乖D，因為我照顧兩個已經無力去追住佢迫佢食。

毛毛將會留到 4 - 4:30pm 先放學。正常嚟講2：30pm 係放學時間但可以補錢比佢留耐D，會有修女看管佢呢group 遲放學嘅小明友,都好等毛毛比修女教訓下。

揀呢間學校係因為papa 同佢妹妹以前都係喺嗰度讀書，同埋reputation 唔錯。毛毛唔可以讀公立學校，因為唔會收佢，意大利嘅教育系統好怪，想要入公立學校要排隊，邊D人有priority 呢？例如單親家庭，同居有細路N 年但唔結婚，low income 人士例如非意國人等等。

我哋有個朋友兩個仔女都讀公立，個媽咪好proud 咁話佢一報名就即收，因為佢申報single mum 又無做嘢，但佢＂老公＂有兩三間鋪，其中一間係做fast food，另外兩間賣gelato呀！基本上如果兩夫妻都有份正職，佢吔嘅仔女都好難入到公立學校。papà 之前上網查詢資料時發現我哋呢區嘅公立學校嘅收生名單只有一小部份係意大利人，其他都係D東歐姓氏多。所以入讀私校唔代表一定富貴，只係迫於無奈啫。唔知除咗意大利，仲有邊個國家會有呢種system?

等開學

保保已經於一星期前開學，所以我而家輕鬆小小咁多，因為毛毛仲有幾日先開學呀，等多幾日我就可以多D時間休息。  雖然唔係我開學但係我一諗起要付責接送兩個仔返學放學就緊張囉，因為由今個學年起佢哋兩兄弟就會返唔同嘅學校。毛毛已經三歳幾所以佢會返幼稚園 ，而保保會繼續返托兒所。其實我咁緊張都係因為我怕搵唔到位泊車，揾到又驚唔識泊！鬼叫我D技術差！毛毛間新學校超大因為係一條龍模式，由幼稚園到初中，所以學生人數多，學校門口亦會喺早上及放學時段塞車。其實嗰度全日都係洎滿車因為附近有藥房，商店及coffee shop。我知自己手車有幾c,唔夠意國人辣同狼，所以前日我載毛毛到學校一轉，等佢適應下新環境，而我就視察下周圍有邊度係比較容易揾位泊車。最好方法咪就係泊遠D唯有行多小小路，早D出門口！就當係做多小小運動，橫掂我吔平時根本冇乜行路。（講黎講去係我自己緊張，當散步係一個excuse啫！）