病態

自從三個星期前無端端將個已經封 幾年嘅麵包機出嚟玩

從此一發不可收拾

見到有人整lemon pull apart bread 

見賣相好yummy

於是又動手

但食譜係用stand mixer 做dough

我只有hand mixer不過有hook attachment 

所以決定唔用麵包機

都知道會麻煩因為要一手按住個bowl

另一隻手渣住個mixer 嚟打dough

嗰日又好熱呀

流汗！攪到手攰又唔知攪得好唔好

算啦起碼個hook attachment 叫做有用過

好香呀！睇相有D乾其實入面好軟

似brioche 

因為已經切好一塊塊先焗

所以食時用手撕就得

加埋cream cheese frosting 仲好味

呢個外面紫色嘅超長loaf tin 終於用得着

下次試下用cinnamon 代替lemon and orange peels

我估應該都OK

呢個椰檳唔好食

可能冇加牛油

食譜嘅coconut filling只用奶糖加椰子

不過意大利人唔好牛油

家人食曬成個

叫我下次都唔洗加牛油

Dried cranberry & yoghurt 排包

毛毛肯食

我就開心

又係吞拿魚包

我煮飯做甜品無presentation 可言

我又唔係food blogger

仲要睇住三條king 

有得食住家麵包佢哋應該開心啦

Papa' 話我更係中咗毒上咗癮

部麵包機原本好好哋沉睡咗幾年

我無啦啦突然要人哋日日開工

真係慘

自從愛上整包後我已經冇整其他甜品

之前見到减價買咗呢兩樣嘢

唔知幾時先會用

Papà 的飛人生活

未轉工前papà 試過連續幾個月不停飛
基本上每星期只有weekend 唔洗飛

新工一樣要飛不過目的地唔同咗
以前多數飛內陸及歐洲
好耐之前就亞洲及乜都有D
以前後生嘛
而家除咗定期去北意及馬來西亞外
其他歐洲國家都唔洗去

因為。。。

Papa'轉戰中東及非洲
主攻沙地阿拉伯，杜拜，黎巴嫩，摩洛哥，毛里求斯，南非等等

可能要去埋印度，巴基斯坦，伊朗

前一排佢去咗阿爾及利亞

Algeria 我知道係非洲國家但exactly 喺邊呢？

原來係摩洛哥嘅鄰居

咁嗰度D人嘅樣係咪似摩洛哥人？
我見意大利嘅摩洛哥人同埃及人有D似
（即係代表我唔識分啦）
又唔係喎係金髪㗎
可能佢哋有法國，北非，阿拉伯血統
混到變成金髮藍眼

今個月大至上都係多數唔喺屋企
上星期一去咗毛里求斯
本來應該係琴日即係星期日去南非
直至今個星期六先返嚟
即是頭尾兩個星期
但幾日前又話要臨時加多轉沙特阿拉伯
本來如果唔去沙特就可以星期六全日自由活動
我仲話咁起碼可以游下水啦
成個海都係你嘅！

反正low season 冇乜遊客
佢話no 喎連唯一一日可以休息嘅日子都落雨
但係因為要去Riyadh 所以佢星期六就離開毛里求斯
仲要上吐下瀉
呢個兩星期長嘅行程就係咁開始：
Rome- Dubai ( 轉機）-Mauritius -Dubai（轉機等6個鐘）- Riyadh（飛55分鐘） - Dubai (轉機）- Johannesburg (再轉機）- Cape Town - Durban - Johannesburg (轉機）- Dubai(再轉機）- 親愛的羅馬
其實本來要去埋Madagascar 但冇直航又唔想坐D舊型小飛機
所以推咗唔洗去！（我初初叫毛毛保保跟papa'去因為佢哋睇過"Madagascar"哈哈講笑咋）

有冇睇到眼花？
想像下幅世界地圖由A點到B點到CDE點
由左到右再向下再向上
計下飛行時間
數下幾多程機
佢唔敢飛某D航空公司而佢要去嘅地方又偏偏咁唔方便
所以佢要去杜拜轉機
不停來來回回去杜拜

我講笑叫佢不如搬去杜拜啦成日要經DUBAI
（講真咁飛法長期下去佢唔掂㗎不如weekend 先返嚟Rome探我哋）
就算而家有時weekend 都未必喺度因為我哋嘅weekend 係休息人哋中東嗰邊唔係weekend 嘛Office 有開㗎
我擔心佢嘅健康多過佢有幾多時間喺度

但我明白佢嘅性格就算攰都要完成工作馬上飛返嚟
咁咪仲辛苦
所以有時佢唔想比佢阿媽知道佢真正嘅行程
怕佢會擔心

前日毛毛學校有活動爸爸冇出席
人哋問我老公去咗邊
我話非洲囉有個mamma話正喎好lucky
另一個問我papa'做機師㗎？
吓？佢飛得多過機師啦
而佢飛嘅pattern 根本係超出咗機組人員嘅合法工作時間
我就話佢似戰地記者多D

琴日毛毛終於問我Papa' 幾時先返嚟

Riyadh, Saudi Arabia 

毛毛四歲生日會

呢個派對毛毛期待咗好耐

去人哋嘅去得多

終於可以輪到佢做主角

唔知由幾時開始流行呢一類型嘅小朋友生日會

場地係一間pizza餐廳

但裡面大部分地方都係一個遊樂場

今次揀呢度因為比較過

都係覺得呢度容易睇住D小朋友

之前去過一個嗰度嘅遊樂場嘅設計

令大人好難可以昅住D細路

另外一個原因係

呢度嘅pizza係超好食

尤其係個皮薄crispy pizza 𥚃面係nutella 上面加小小糖粉

大人細路都鍾意

我哋冇唸過呢D地方嘅pizza都做得咁好

仲以為佢都係求求期期

連平時去親party 都食好少嘢嘅Papa'

竟然比我見到佢狂食pizza

99 食完話好好味如果食唔完就打包

Papa'因為又要飛佢埋完單就提早走人

返到屋企兩兄弟更係爭玩新禮物

我仲以為佢哋一定好攰點知仲精神過平時


我諗年尾可能又返嚟呢度幫保保慶祝3歳生日

寫意的一天@Anzio, Rome

                                         
                                           琴日天氣好好我哋一家五囗去咗海邊食lunch

因為天氣好預咗一定會人多難揾位

所以早咗出門

今次試下呢間新開嘅餐廳

 

毛毛一定係食pasta 仲要係最簡單嗰隻

好多小朋友出親街都係要order "白意粉"

因為佢哋唔多鍾意食復習嘅嘢

即意粉加salt ,olive oil + grated parmigiano 

聽落無乜特別但其實幾好味㗎

我以前食唔慣

似中國人嘅豉油撈飯感覺

唔係白就係"紅意粉"

即係加咗茄汁咁簡單

呢碟係Papa 嘅

大家都知係乜啦

平時我好少食gnocchi 

見佢係配呢幾種海鮮加蕃茄(allo scoglio)所以先想食

第二道菜我同Papa' 一人一碟

早知咁大份叫一份算

蝦下面其實有好多calamari 

今餐盛惠€55 

包括兩瓶水

可樂

麵包

兩小碟白意粉

兩客炸薯條(我話一客夠papa係都要叫兩客）

伴菜size 嘅green salad

我碟炸物食唔曬

Papa'因為剛去完黎巴嫩返嚟

話冇啖好食

所以好快就清矖佢嘅第一二道菜

連我嘅gnocchi 都偷食埋

但係就幫唔到我清下D calamari 

呢一檔係賣糖果同玩具

通常呢D街檔玩具都係D傳統式嘅玩意

簡簡單單

風車膠波氣球同理紙盒前面有兩個輪

比好細個小朋友一路行一路推嘅東西

最新嘅都係嗰個Despicable 公仔氣球 

係咪好似時光倒流？

定係停留？

呢個畫面我好記得17歲第一次踏足意大利見過

而大學時期本意語text book 

裡面都有類似嘅圖片(可能D相冇換過）

每次經過呢D檔口我好自然會停一停望一望

賣嘅食物係波板糖奶嘴糖棉花糖花生糖

好懷舊呀

喺香港去邊度揾？

就算係喺呢邊嘅玩具店賣嘅玩具大部分都係成人化

電子化冇乜童真

有日突然想起波子

但係唔覺有見過囉

冇demand? 冇supply?

保保見毛毛有乜佢就要乜

人食乜佢就食乜

士多啤梨味piedone (大腳板）

保保食咗一啖就唔食

我叫佢起碼食一隻腳指佢都唔肯

毛毛食咗10隻腳指

最後我叫Papa' 唔好浪費食吐佢啦

我哋行行下毛毛停咗C都唔肯走

話要玩跳水喎

點跳呀？見到水就話跳

路人聽到見到佢個樣都笑咗出嚟

我哋二拖/推三已經多人望

不過我哋以前咪一樣望人哋

哈哈

返到屋企又叉唔多要煮晚飯

心型呑拿魚包

突然想食港式麵包

而且廚房部機係papà 六年前買

到今日先一共用過五次

就決定跟jessie-cookingmoments個食譜整呑拿魚包

我唔識整麵包所以好少少整

有時睇recipe 見到D 做麵包嘅terminology 都唔明

焗好後我食咗兩個

覺得自己返咗香港咁

意大利麵包比較硬

要食軟同帶亞洲風味

唯有自己做

原來

做麵包係會令人上癮...

小毛毛語錄（二）

有一日毛毛發脾氣佢話

"我要換mamma,唔想見到你個様，你可唔可以換咗個頭？"
（佢D玩具可以換頭同身體)

有一次我叫佢同保保一齊玩，佢話

"我唔要細佬，我要哥哥，畀個哥哥我！"

最好笑係：

琴日毛毛嘅cousin嚟探我哋

佢得6歳半

我問佢覺得Alessio 似邊個？似毛毛？保保？定係...

我未講完佢好快就答我

"佢似dinosauro preistorico " (prehistoric dinosaur)

哈哈哈

係喎真係幾有想像力

其實佢講得啱

Alessio 一出世就好多頭髮仲要係超級長

同佢吹完頭D頭髮"樹"起

Punk 到成隻恐龍咁

人生如戲

去年六月收到一個壞消息
Papà 嘅表嫂突然離世
有一晚表哥出去買pizza take away
佢太太沖完涼坐咗喺梳化休息
表哥返到屋企見張飯枱仲未set 好
覺得奇怪就問佢仔仔點解mamma冇set 枱
仔仔話 mamma 喺梳化度瞓着咗
(佢哋屋企好大所以冇即時見到佢太太）
表嫂再冇醒過來...
雖然我只係同表嫂見過一兩次面
但聽到一個咁突然嘅消息
太震撼
眼淚流

出殯當日好多人出席包括佢哋仔仔嘅同學
細女無出現因為佢只得六歳
哥哥嘅年紀都好細佢讀緊初中
而佢哋嘅媽咪只係四十出頭
聽papà 嘅舅母講表哥一家好注重健康
而且飲食方面佢哋多數都買有機食物
表嫂過身前身體狀況並無任何異樣

死因係...

其實我唔肯定正確原因係乜
因為我嘅意大利文好差所以聽唔明醫學名稱
不過就聽到有個血字同惱字
可能係惱血管栓塞

我以前未去過喪禮今次係第一次
我嘗試叫自己忍住唔好喊
但大家嘅心情都好沉重
眼淚係可以傳染
教堂內大部份嘅人都控制唔到自己
特別係當我望見坐第一行嘅仔仔
佢一滴眼淚都冇流過
面部毫無表情
我就更加難過

唔代表佢唔傷心
可能一時間佢表達唔到佢嘅感受
或者只係收埋
唔知點解每當我見到佢目無表情嘅樣
我就有一種解釋唔到嘅感覺
再望下佢爸爸
眼淚又不禁流下
然後我又諗做大人嘅應該點樣同小朋友解釋死亡

舊年聖誕見番佢哋再兄妹及父親
因為我唔清楚妹妹知唔知道佢媽咪嘅事
所以我唔敢同佢傾太多計
一來佢同我唔熟
二來我怕一時講出敏感字眼
原來佢好健談就好似一般嘅小女孩一様
佢問我哋幾多歳佢話佢mamma 45 歲
後來我問99 其實妹妹知唔知道真相
原來佢嘅家人有同佢講過

喪禮過後大約兩星期
有個好消息
Papà 嘅妹妹終於懷孕

再過多兩三個星期
倫到我發現自己有咗
我叫papà 打電話聯絡幫我頭兩胎開刀嘅醫生
因為我對佢有信心想揾返佢
Papà 話醫生嘅手機無人聽
後來打去診所但電話號碼不存在
上網Google 原來醫生已經喺一個月前逝世
當時我搭緊地鐵返工喺電話度聽到papà 話" e' morto"
我嚇咗一跳 morto ? Dead? Really?
Papà 叫我上網睇

好傷心
話曬我頭兩胎都係佢接生
而且生完第二胎留院每日佢會嚟探我哋兩次
我同佢講笑問佢係咪又嚟醫院幫人開刀？
點解會咁問？
因為生保保嗰日原本我要早上八點半到醫院

我哋出門已經遲咗點知路上遇上塞車block路有兩宗交通意外
我哋成十點先到
做手術時不時聽到有人哎快D快D十二點有人book咗
我望下個鐘嗰陣已經十一點幾...
啊原來呢位醫生一次過張我同佢另外一個patient book埋同一曰做c - section
佢答No 佢啱啱喺附近做完一個boob job 喎！
嘩佢真係周身刀撈咁多瓣
醫生只係六十多歲
對上一次見佢係保保出世後一個月做檢查
佢嘅心情有D down
同我哋講佢等緊個body check report
身體有D事唔係咁樂觀
不過我哋無問佢太多details

所以一聽到Papa 話醫生已經走咗我哋要揾第二個
我忍唔住流眼淚

唔好意思今次寫咗一D可能影響大家心情嘅嘢
下一篇會係輕鬆D